సికింద్రాబాద్ పార్లమెంటరీ నియోజకవర్గంపై మంత్రి కేటీఆర్ సమీక్ష

జిహెచ్ఎంసి పరిధిలో లక్ష డబుల్ బెడ్ రూం ఇళ్ల నిర్మాణాన్ని పూర్తి చేసే లక్ష్యంతో ముందుకు వెళ్తున్నామని పురపాలక శాఖ మంత్రి కేటీఆర్ తెలిపారు. ఇందులో భాగంగా లక్ష డబుల్ బెడ్ రూమ్ ఇళ్ల నిర్మాణానికి టెండర్లు పూర్తి చేసినట్లు వెల్లడించారు. ఆయా అసెంబ్లీ నియోజకవర్గాల వారీగా డబుల్ బెడ్ రూమ్ ఇళ్ల నిర్మాణానికి ప్రజా ప్రతినిధులు మరింత చొరవ తీసుకోవాలని కోరారు. ఈ నెలాఖరులోగా ఎంపిక చేసిన అన్ని సైట్లలో పనులు ప్రారంభం అయ్యేలా చూడాలని, లేకుంటే వాటి స్ధానంలో అనుకూలంగా ఉన్న ఇతర ప్రాంతాల్లో డబుల్ బెడ్ రూమ్ ఇళ్లు నిర్మిస్తామన్నారు. సికింద్రాబాద్ పార్లమెంటరీ నియోజకవర్గంలోని పలు అభివృద్ధి కార్యక్రమాల అమలుపై మంత్రి కేటీఆర్ సచివాలయంలో సమీక్ష జరిపారు.

ముఖ్యమంత్రి కేసీఆర్ ఆదేశాల మేరకు పార్లమెంటరీ నియోజకవర్గాల వారీగా సమీక్షా సమావేశాలు నిర్వహిస్తున్నట్లు మంత్రి కేటీఆర్ తెలిపారు. ఇప్పటికే మల్కాజిగిరి నియోజకవర్గ సమీక్ష నిర్వహించినట్లు చెప్పారు. ఈ రోజు జరిగిన సమీక్ష సమావేశంలో పురపాలక శాఖ ఆధ్వర్యంలో చేపట్టిన పలు అభివృద్ధి కార్యక్రమాలను, వాటి పురోగతిపై మంత్రి కేటీఆర్ ప్రజా ప్రతినిధులకు వివరాలు అందజేశారు. ముఖ్యంగా సికింద్రాబాద్ పార్లమెంటరీ నియోజకవర్గ పరిధిలోని అసెంబ్లీ నియోజకవర్గాల వారీగా ఆయా కార్యక్రమాలను మంత్రి వివరించారు.

నాలా విస్తరణ మరియు అభివృద్ధి, జలమండలి కార్యక్రమాలు, ఎస్సార్డీపి ప్రాజెక్టులు, రోడ్డు విస్తరణ మరియు జంక్షన్ల అభివృద్ధి, మోడల్ మార్కెట్ల నిర్మాణం, పార్కుల అభివృద్ధి, ఎల్ఈడీ లైట్ల బిగింపు వంటి అంశాలపైనా ఈ సమావేశంలో చర్చించారు. దీంతో పాటు నగర పారిశుధ్యం, రోడ్ల మరమ్మతులు, విద్యుత్ శాఖ, రెవెన్యూ శాఖలకు సంబంధించిన పలు అంశాలపైన చర్చించారు.

హైదరాబాద్ నగరంలోని ప్రభుత్వ ఖాళీ స్థలాలను కాపాడేందుకు ప్రత్యేకంగా చర్యలు తీసుకుంటున్నామని మంత్రి కేటీఆర్ తెలిపారు. ఇందుకోసం ప్రభుత్వ ప్రధాన కార్యదర్శి, రెవెన్యూ శాఖ, జీహెచ్ఎంసీ అధికారులతో ఒక సమావేశాన్ని త్వరలో ఏర్పాటుచేసి, ఖాళీ స్థలాల రక్షణకు తీసుకోవాల్సిన చర్యలపై చర్చిస్తామన్నారు. నాలాల విస్తరణకు సంబంధించి త్వరలోనే ప్రత్యేక డ్రైవ్ చేపడతామని, ఇందుకోసం వందమంది సిబ్బందిని టౌన్ ప్లానింగ్ విభాగానికి ఇవ్వనున్నట్లు మంత్రి చెప్పారు. నాలాల విస్తరణ, పూడికతీత, వాటి అభివృద్ధి వంటి అంశాలపైన ప్రజాప్రతినిధుల నుంచి మంత్రి సలహాలు తీసుకున్నారు.

సికింద్రాబాద్ నియోజకవర్గ పరిధిలో రైల్వే శాఖ, రక్షణ శాఖల్లో పెండింగ్ లో ఉన్న అంశాల పైన వారితో ఒక సమావేశం ఏర్పాటు చేయనున్నట్లు  మంత్రి కేటీఆర్ తెలిపారు. నగర పాలనలో అద్భుతమైన ప్రగతి సాధించిన, నగరాలు లేదా దేశాలను అధ్యయనం చేసేందుకు ప్రజాప్రతినిధులు, అధికారులు ప్రత్యేక పర్యటనకు వెళ్లి రావాల్సిందిగా మంత్రి కోరారు. పార్లమెంటరీ నియోజకవర్గాల వారీగా సమీక్ష సమావేశాలను కొనసాగిస్తామని, ప్రతి మూడు నెలలకోసారి ఒక్కో పార్లమెంటు నియోజకవర్గంలో జరుగుతున్న కార్యక్రమాలు పర్యవేక్షిస్తామని ఈ సందర్భంగా కేటీఆర్ ప్రకటించారు.

ఉపముఖ్యమంత్రి మహ్మమూద్ అలీ, మంత్రులు నాయిని నర్సింహారెడ్డి, తలసాని శ్రీనివాస్ యాదవ్, పద్మారావు, సికింద్రాబాద్ ఎంపీ బండారు దత్తాత్రేయ మరియు నియోజకవర్గ పరిధిలోని ఎమ్మెల్యేలు, అధికారులు ఈ సమావేశంలో పాల్గొన్నారు.